Qiymətləndirmə fəaliyyətinin digər əsas istiqamətlərindən biri qeyri-yaşayış təyinatlı daşınmaz əmlakdır. Bu tip əmlaklar müxtəlif təyinatlı, fərqli funksiyalı coxsaylı növlərə ayrılır. Adi qarajdan tutmuş böyük biznes mərkəzlərə qədər müxtəlif təyinatlı daşınmaz əmlaklar qeyri-yaşayış təyinatlı daşınmaz əmlaklara aiddir. Bu mənada qeyri-yaşayış təyinatlı daşınmaz əmlakların qiymətləndirilməsində müxtəlif amillər nəzərə alınır ki, bunlar da fərqli yanaşmalar tələb edir. 

Qeyri-yaşayış təyinatlı daşınmaz əmlakların qiymətləndirilməsində daha çox aşağıdakı əmlak növlərini rast gəlinir:

• Ofislər
• Ticarət obyektləri
• Xidmət sahəsi üzrə obyektlər
• İaşə obyektləri
• Anbarlar
• Qarajlar
• İstixanalar
• İstehsal binaları və s.

Qeyri-yaşayış təyinatlı obyektlərin qiymətləndirilməsi zamanı qiymətləndirici fərdi qaydada araşdırmaların aparılması ilə yanaşı, müvafiq analoqların qiymətləri barədə məlumatların əks olunduğu müxtəlif mənbələrin, o cümlədən rieltor firmalarının və bu sahədə fəaliyyət göstərən kütləvi informasiya vasitələrinin məlumatlarını nəzərə almaqla aşağıdakı məqamlara diqqət yetirir:

• Obyektin tipi;
• Obyektin istismara verildiyi il;
• Aşınma səviyyəsi (fiziki, mənəvi, funksional);
• Yerləşdiyi rayon (ərazi) və onun ekoloji vəziyyəti;
• Yerləşdiyi mərtəbə (yaxud mərtəbəliliyi);
• Ümumi sahə;
• Eyvanların sayı və sahəsi;
• Obyektdəki dizayn işlərinin vəziyyəti və səviyyəsi;
• Texniki sistemlərin vəziyyəti (mühəndis kommunikasiyaları ilə təminat);
• Ərazinin nəqliyyat infrastrukturu ilə təminatı səviyyəsi və mövqeyi (əraziyə işləyən sərnişin nəqliyyatı vasitələrinin sayı, dayanacaqlardan, yoldan, metrodan hansı məsafədə yerləşməsi);
• Ticarət, xidmət və digər sosial obyektlərdən istifadəyə görə əlverişli mövqeyi,
• Gediş-gəliş yolunun vəziyyəti;
• Obyektin yaşayış məntəsində yerləşmə mövqeyi;
• Obyektin eyvan və pəncərələrindən ətrafa görünən mənzərə və s.